Böyük Britaniya sakinləri baş nazir Devid Kameronun iqamətgahında siçanın görüntüləndiyi kadrlardan şoka düşüb. Siçan BBC telekanalının canlı yayımı zamanı Londonda Downing Street, 10 ünvanında yerləşən binanın pilləkənlərində nəzərə çarpıb. Reportaj fərqli mövzuda olsa da, bu görüntü tam təsadüfi olub. BBC-nin siyasi məsələlər üzrə müxbiri Qari O'Donogue baş nazir Devid Kameronun sosial təminatla bağlı islahatlara dair planlaşdırılan çıxışından danışarkən siçan nə müxbirə, nə də çəkiliş qrupuna əhəmiyyət verməyərək cəld öz işinin dalınca qaçıb. Bu video görüntü Böyük Britaniya telekanalları və internetdə böyük marağa səbəb olub.
Vaxtilə qərargahda siçanların ovu üçün xüsusi pişiklər saxlanılsa da, onlar artıq uzun müddətdir yoxdur. "Siçan komandiri” ləqəbi ilə tanınan əfsanəvi pişik Hemfri üç baş nazir- Marqaret Tetçer, Con Meycer və Toni Blerə xidmət göstərib.
